วาจยิํสุ ตทาภิกฺขู, โปตฺถกตฺตย เมกโต;

คนฺถโต อตฺถโต จาปิ, ปุพฺพาปรวเสน วาฯ

[241]

เถรวาเทหิ ปาฬิหิ, ปเทหิ พฺยญฺชเนหิ จ;

อญฺญตฺถตฺตมหูเนว, โปตฺถตฺถเกสุปิ ตีสุปิฯ

[242]

อถ อุคฺโฆสยิ สงฺโฆ, ตุฏฺฐหฏฺโฐ ติเสสโต;

‘‘นิสฺสํสยา’ยํ เมตฺเตยฺโย’’, อิติ วตฺวา ปุนปฺปุนํฯ

[243]

สทฺธิมฏฺฐกถายา’ทา, โปตฺถเก ปิฏกตฺตเย;

คนฺถกาเร วสนฺโต โส, วิหาเร ทุรสงฺกเรฯ

[244]

ปริวตฺเตสิ สพฺพาปิ, สีหฬฏฺฐกถา ตทา;

สพฺเพสํ มูลภาสาย, มาคธาย นิรุตฺติยาฯ

[245]

‘‘สตฺตานํ สพฺพภาสานํ, สา อโหสิ หิตาวหา;

เถริยา จริยาสพฺเพ, ปาฬิํวิย ตมคฺคยฺหํฯ

[246]

อถ กตฺตพฺพกิจฺเจสุ, คเหตุ ปรินิฏฺฐิติํ;

วนฺทิตุํ โส มหาโพธิํ, ชมฺพุทีปมุปาคมิฯ

[247]

สุตฺวา ทฺวาวีสวสฺสานิ, มหานาโม มหามหิํ;

กตฺวา ปุญฺญานิ จิตฺรานิ, ยถา กมฺมมุคาคมิฯ

[248]

สพฺเพ’เป เต ธรณีปตโย มจฺจุมจฺเจตุมนฺเต,

โน สกฺขิํ สูปจิตสุขพลาสาธุ สมฺปนฺนโภโค;

เอวํ สพฺเพ นิธนวสคา โหนฺติ สตฺตา’ติ นิจฺจํ,

ราคํ สมฺมา วินยตุธเน ชีวิเต จาปิ ธีมาฯ

สุชนปฺปสาทสํเวคตฺถาย กเต มหาวํเส

ปญฺจราชโก นาม

สตฺตติํสติโม ปริจฺเฉโทฯ

อฏฺฐติํสติม ปริจฺเฉท

ทสราชโก

[1]

มหานาม สุโต อาสิ, ทมิฬี กุจฺฉิสมฺภโว;

โสตฺถิเสโน, ตถาสงฺโฆ-ธีตา จา’สิ มเหสิยาฯ

[2]

โสตฺถิเสโน ตทา รชฺชํ, ปตฺวา สงฺฆยนาสิโต;

ตสฺมิํเยว ทิเน เภริํ, จราเปตฺวา ตทา ตุ สาฯ

[3]

อตฺตโน สามิกสฺสทา, ฉตฺตคฺคาหกชนฺตุโน;

ฉตฺตคฺคาหกวาปิํ โส, กตฺวา สํวจฺฉเร มโตฯ

[4]

อถ มจฺโจ มหาปญฺโญ, สหาโย ตสฺส ตํ มตํ;

อนฺโตวตฺถุมฺหิ ฌาเปตฺวา, วีหิโจรํ มหาพลํฯ

[5]

รชฺชโยคฺโคติ จินฺเตตฺวา, กตฺวา ตํ ภูปติํ รโห;

อนฺโตเยว นิวาเสตฺวา, ราชา โรคาตุโร อิติฯ

[6]

ยสํ รชฺชํ วิจาเรสิ, ฉเณ ปตฺเต มหาชนา;

ราชา เจ อตฺถิ อมฺเหหิ, สทฺธิํ เมตูติ โฆสยุํฯ

[7]

ตํ สุตฺวา นรปาโล โส, สพฺพลงฺการมณฺฑิโต;

สมานํเต มหานาเค, เนสโยคฺคา มมา’ติโสฯ

[8]

ทาฏฺฐาธาตุฆรฐาเน, สุวา นาคํ สมาทิสิ;

รญฺโญ อาณาติ วุตฺเต โส, อคา อารุยฺห ตํ ปุรํฯ

[9]

กตฺวา ปทกฺขิณํ คนฺตฺวา, ปาจินทฺวารโต พหิ;

ปฐเม เจติยฐาเน, ธาตุนาคํ สมปฺปยิฯ

[10]

มหาเจติตฺตเย หตฺถิ-ปากาเร’กาสิ โตรณํ;

มิตฺตเสโน พหุํ ปุญฺญํ, กตฺวา วสฺเสน โส จุโตฯ

[11]

มิตฺตเสนํ รเณ หนฺตฺวา, ทมิโฬ ปณฺฑุนามโก;

อาคโต ปรตีรมฺหา, ลงฺการชฺชมการยิฯ

[12]

ชนา กุลีนา สพฺเพปิ, โรหณํ สมุปาคตา;

โอรคงฺคาย อิสฺเสรํ, ทมิฬา เอว กปฺปยุํฯ

[13]